தமிழ் ஓசை
தமிழ் ஓசை

இந்திய மீனவர்களை யாழ். சிறைக்கு மாற்ற உத்தரவு

0 109

 தமிழகம் நாகை மாவட்டம் அக்கரைப்பேட்டையில் இருந்து கடந்த 11ஆம் திகதி மீன்பிடிக்க இலங்கைக் கடற்பரப்பிற்குள் வந்த வேளை இலங்கைக் கடற்படையினரால் கைது செய்யப்பட்ட அகத்தியன், சிவராஜ், சிவசக்தி, சம்பத், முருகன் உள்ளிட்ட 23 மீனவர்களை யாழ்ப்பாணம்  சிறைச்சாலைக்கு  மாற்ற உத்தரவிடப்பட்டுள்ளது.

கைது செய்யப்பட்ட 23 மீனவர்கள் காங்கேசன்துறைக் கடற்படை முகாமில் தங்க வைக்கப்பட்டிருந்தனர்.

இதனிடையே நேற்று குறித்த மீனவர்களின் வழக்கு விசாரணைக்கு வந்தது.

வழக்கை விசாரித்த பருத்தித்துறை நீதிமன்ற நீதிபதி கிஷாந்தன், மீனவர்கள் அனைவரையும் நவம்பர் மாதம் 11 ஆம் திகதி வரை நீதிமன்ற காவலை நீட்டித்து உத்தரவிட்டார்.

இந்நிலையில் கடற்படைத் தளத்தில் தங்கியுள்ள மீனவர்கள் 23 பேரையும் யாழ்ப்பாணம் சிறைக்கு மாற்றக் கோரி யாழ்ப்பாணம் மீன் வளத்துறை அதிகாரிகள் மனு அளித்திருந்தனர்.

 மனுவை விசாரித்த நீதிபதி மீனவர்கள் 23 பேரையும் யாழ்ப்பாணம் சிறையில் அடைக்க உத்தரவிட்டார்.

மேலும் இன்று மீனவர் வழக்கில் ஆஜரான இந்தியத் துணைத் தூதரக அலுவலக சட்டத்தரணி, மீனவர்கள் 23 பேரையும் தூதரக அதிகாரிகள் நேரில் சந்தித்து தமிழகத்திலுள்ள மீனவர்களின் உறவினர்களிடம் தொலைபேசி வாயிலாக பேச ஏற்பாடு செய்ய வேண்டும். 

மீனவர்களுக்குத் தேவையான அத்தியாவசியப் பொருட்களை தூதர அதிகாரிகள் வழங்க நீதிபதியிடம் அனுமதி கோரப்பட்டது.

அதற்கு பருத்தித்துறை நீதிமன்ற நீதிபதி வரும் முதலாம் திகதி மீனவர்களை இந்தியத் துணைத் தூதரகம் சார்பில் யார் நேரில் சந்திக்கிறார்கள் என்ற விபரத்தை நீதிமன்றத்தில் தெரிவிக்கும் படி உத்தரவிட்டார்.

இதேவேளை, வரும் 4 ஆம் திகதி தீபாவளி பண்டிகை கொண்டாடப்படவுள்ள நிலையில் இலங்கைச் சிறையிலுள்ள தமிழக மீனவர்களை  அரசாங்கம்  நல்லிணக்க அடிப்படையில் விடுதலை செய்யும் என எதிர்பார்த்த நிலையில் மீனவர்களைச் சிறைக்கு மாற்றியுள்ளது நாகை மாவட்ட மீனவர்களிடையே சோகத்தை ஏற்படுத்தியுள்ளது.

Leave A Reply

Your email address will not be published.